LSI kundër Ramës për taksën për makinat me gaz.
Ministri i Mjedisit, Lefter Koka, u shpreh kundër vendosjes së akcizës për gazin e lëngshëm që përdoret për automjetet.
“Do kërkoja që të paktën ky zë në paketën fiskale të rishikohet. Nuk po them të subvencionohet, por s’mund t’i vihet akcizë pasi janë rreth 3 për qind e automjeteve që sot përdorin gazin e lëngshëm dhe nuk besoj se prishen ekuilibrat”, deklaroi Koka duke shtuar se ky kundërshtim me politikat dhe angazhimet për uljen e ndotjes nga djegia e karburanteve.
Në paketën fiskale qeveria ka parashikuar vendosjen e një akcize prej rreth 13 lekë për litër për gazin e lëngshëm që përdoret nga automjetet dhe duke përjashtuar atë për ngrohje, por Koka është kundër kësaj. “Po ta shohësh si shifër, nëse kemi thënë se do investohen deri në vitin 2030 miliona euro dhe në këtë zë është rreth 100 milionë euro, presupozohet investim nga privatët. Çka do të thotë që çdo qytetar që disponon një automjet monton një impiant gazi që e blen me kosto të ulët dhe në këtë rast ne duhet t’i stimulojmë dhe jo t’i vendosim akcizë”, nënvizoi Koka.
