Nga BoldNews.al
Prokurori i Përgjithshëm, Olsian Çela, ka thirrur në 28 janar mbledhjen e përgjithshme të prokurorëve për të votuar për plotësimin e dy vendeve vakante në Këshillin e Lartë të Prokurorisë.
Në përfundim të procesit të verifikimit, Prokuroria e Përgjithshme ka kualifikuar të pestë kandidatët që kishin dorëzuar më herët aplikimet e tyre.
Në garë është një vend vakant nga radhët e prokurorëve të shkallës së parë dhe një nga radhët e Apelit.
Për vakancën e krijuar nga shkallët e Apelit, pas largimit të ish-anëtarit të KLP-së, Arben Dollapaj, garon vetëm një kandidat. Ai është prokurori i Apelit të Durrësit, Moisi Duda, i cili do të votohet vetëm formalisht në një proces pa konkurencë.
Ndërkohë, gara më e fortë pritet të jetë për plotësimin e vakancës nga shkalla e parë e prokurorisë, e krijuar pas largimit të ish-anëtarit Besnik Cani.
Për këtë pozicion konkurojnë katër kandidatë- Zeqir Hoda, prokuror në Tiranë; Elona Alvora dhe Albert Kuliçi nga prokuroria e Vlorës; si edhe Eloida Goxhi nga prokuroria Berat.
Këshilli i Lartë i Prokurorisë po funksionon prej rreth një viti me 9 anëtarë, nga 11 që ka parashikuar ligji.
Ish-anëtarët Besnik Cani dhe Arben Dollapaj u larguan nga detyra në Shkurt të vitit 2020.
Ndërkohë që Prokuroria e Përgjithshme përgatitej për të zhvilluar mbledhjen e prokurorëve, nga ku do të dilnin dy anëtarët e rinj nga radhët e prokurorëve, vendi u përfshi në masat shtrënguese për shkak të Covid-19.
Olsian Çela ka thirrur edhe dy herë më parë mbledhjen e përgjithshme të prokurorëve, e përbërë nga rreth 300 anëtarë.
Por, në të dy rastet është detyruar të tërhiqet, pasi rregullat e parashikuara nga Komiteti Teknik për pandeminë nuk lejojnë organizimet masive.
Tashmë, kur edhe Këshilli i Lartë i Prokurorisë ka shpeshtuar kërkesat ndaj Prokurorit të Përgjithshëm për plotësimin e dy vakancave në “qeverinë e prokurorëve”, duket se është gjetur një zgjidhje e mesme, duke shmangur grumbullimin, por edhe duke realizuar votimin.
Prokurorët e Shqipërisë do të votojnë në orare të ndryshme, të grupuar sipas prokurorive lokale.
Në njoftimin për Mbledhjen e Përgjithshme të Prokurorëve, gjendet i detajuar edhe orari për kryerjen e votimit të ndarë.
Votimi, i cili do të zhvillohet në ambjentet e Polit të Drejtësisë, do të fillojë me prokurorët e Shkodrës dhe do të përfundojë me ata të Prokurorisë së Përgjithshme, të cilët do të paraprihen nga prokurorët e SPAK-ut.
Orari i Votimit (11:15 – 14:00):
11:15 – 11:20 Prokuroria e Shkallës së Parë Dibër
11:20 – 11:30 Prokuroria e Shkallës së Parë Pogradec, Prokuroria e Shkallës së Parë Korçë,
Prokuroria e Apelit Korçë
11:30 – 11:40 Prokuroria e Shkallës së Parë Vlorë, Prokuroria e Apelit Vlorë
11:40 – 11:50 Prokuroria e Shkallës së Parë Gjirokastër, Prokuroria e Shkallës së Parë Sarandë, Prokuroria e Apelit Gjirokastër
11:50 – 12:00 Prokuroria e Shkallës së Parë Vlorë, Prokuroria e Apelit Vlorë
12.00 – 12.05 Prokuroria e Shkallës së Parë Berat
12:05 – 12:10 Prokuroria e Shkallës së Parë Fier
12:10 – 12:15 Prokuroria e Shkallës së Parë Lushnjë
12:15 – 12:20 Prokuroria e Shkallës së Parë Kavajë
12:20 – 12:25 Prokuroritë e Shkallës së Parë Pukë, Kukës e Tropojë
12:25 – 12:35 Prokuroria e Shkallës së Parë Shkodër, Prokuroria e Apelit Shkodër
12:35 – 12:40 Prokuroria e Shkallës së Parë Lezhë
12:40 – 12:45 Prokuroria e Shkallës së Parë Kurbin, Mat
12:45 – 12:55 Prokuroria e Shkallës së Parë Elbasan
12:55 – 13:05 Prokuroria e Shkallës së Parë Durrës, Prokuroria e Apelit Durrës
13:05 – 13:10 Prokuroria e Shkallës së Parë Krujë
13:10 – 13:40 Prokuroria e Shkallës së Parë Tiranë, Prokuroria e Apelit Tiranë
13:40 – 13:50 Prokuroria e Posaçme
13:50 – 14.00 Prokuroria e Përgjithshme
