Nga BoldNews.al
Disa punime arnuese në rrugët e asfaltuara dobët nën mandatin e Erion Veliajt në zonën e “Ali Demit” në Tiranë ngrenë dyshime se, kur vjen fjala tek fondet publike, maxhoranca e përfaqësuar nga kryebashkiaku dhe eksponentë të rëndësishëm të Partisë Demokratike në opozitë e gjejnë më së miri gjuhën e përbashkët.
Prej disa ditësh, një rrugë kryesore pranë asaj që njihet si “Fusha e Ali Demit”, ishte mbushur me gropa e kanale, pas disa punimeve të kryera nga Ujësjellës-Kanalizime e Tiranës.
Gjendja e rrugës ishte shndërruar në një problem për mijërat e banorëve që kalojnë në atë rrugë.
Madje, një shqetësim të tillë duhet të ketë pasur edhe kryeministri Edi Rama, i cili qarkullon më së paku dy herë në ditë në atë aks rrugor, gjatë udhëtimit nga shtëpia në Surrel drejt zyrës dhe kthim.
Por, këtë “hall” duket se ia ka zgjidhur shumë shpejt Sahit Dollapi, një prej njerëzve më të rëndësishëm të Partisë Demokratike në opozitë.
Një “ushtri” e tërë punonjësish të kompanisë private “Onyx”, në pronësi të Sahit Dollapit, janë angazhuar që në orët e para të mëngjesit të së Hënës për të mbuluar dhe sistemuar dëmet e lëna në rrugë nga vartësit e kryebashkiakut të Tiranës, Erion Veliaj.
Në fakt, punonjësit e “Onyx”, siç tregohet edhe në fotot që shoqërojnë këtë shkrim, janë angazhuar për sistemin e rrugëve, pasi, në korrik 2020, Sahit Dollapi fitoi një tender me vlerë rreth 200 mijë dollarë për “Shërbimin e pastrimit dhe mirëmbajtjes së pusetave”, të zhvilluar nga Ujësjellësi i Tiranës.
Natyrisht, kompania e Sahit Dollapit nuk ka asnjë ndalim të marrë pjesë në tendera publikë dhe të përfitojë nga institucionet shtetërore, në ato raste kur plotëson kushtet dhe kriteret ligjore.
Megjithatë, bashkëpunimi i Sahit Dollapin me Erion Veliaj krijon një shije të hidhur, duke forcuar gjithnjë e më shumë dyshimet publike se “paraja i bashkon politikanët”.
Sahit Dollapi është Sekretar Organizativ në Partinë Demokratike dhe ka detyrën kryesore për të organizuar fushatën, njerëzit, për të bindur qytetarët e pavendosur që të votojnë opozitën në zgjedhjet e përgjithshme të 25 Prillit 2021.
Dollapi është gjithashtu përgjegjës i asaj strukture në Partinë Demokratike, e cila ka për detyrë të dalë në terren dhe të zbulojë e denoncojë punët publike dhe shpenzimet e tepruara të kryera nga Erion Veliaj në krye të Bashkisë së Tiranës.
Por, nga ana tjetër, Sahit Dollapi i “Onyx” paguhet për të mbuluar punimet e dobëta të “Lali Erit”.
