Dy problemet themelore që duhet të trajtojë komisioni parlamentar i reformës në drejtësi, për ish kryetarin e KQZ, Kristaq Kume, janë financimi i partive dhe fushatës elektorale dhe depolitizimi i komisionerëve zonale të cilët administrojnë zgjedhjet.
Në një intervistë për Ora News, Kume tha gjithashtu se vota e emigrantëve mund të ndikojë kahun e pushtetit në parlamentin e ardhshëm shqiptar dhe për këtë duhet llogaritur pesha elektorale e tyre, pasi kjo nuk është normale.
Kur duhet edhe 1 muaj nga përfundimi i mandatit të komisionit parlamentar të reformës zgjedhore, ish kryetari i Komisionit Qendror të Zgjedhjeve, Kristaq Kume, mendon se rregullimi i ligjit për financimet e partive është thelbësor për të siguruar transparencë në procesin elektoral, si dhe eleminimin e fenomenit të blerjes së votës
Kume: Financimi nga burime të paidentifikuara nuk ka arritur të shmanget nga ajo cka parashikon kodi zgjedhor. Është e nevojshme të ndërhyhet në kod. Partitë politike të detyrohen nëpërmjet kodit që të deklarojnë të gjithë financimet që ato përfitojnë në kuadër dhe për fushatën zgjedhore. Së bashku me financimin, depolitizimi i komisionerëve që do të administrojnë zgjedhjet është i rëndësishëm, për të patur zgjedhje me standarde dhe të pakontestuara.
Kume: Nëse do të mund të arrihet një gjë e tillë, që do të thotë KZ, KQN dhe grupet e numërimit të mos jenë me përfaqësues të partive politike unë do të thosha që ky do të jetë nëj zhvillim goxha i mirë. Kohë për të siguruar legjislacionin për votën e emigrantëve ka, por duhen përcaktuar rregullat e llogaritjes së peshës elektorale të tyre
Kume: E rëndësishme është për mua që të gjykohen dhe të merret mendim dhe për efektin që mund të sjelli vota e emigrantëve në strukturën politike të Kuvendit. Janë rreth 30% e shtetasve shqiptarë që jetojnë jashtë që kanë të drrejtën e votës. Mund të ndodhi që vota e tyre mund të komandojë strukturën e ardhshme të Kuvendit gjë qe nuk është normale. Për sa i përket sistemit elektoral, Kume tha se çdo sistem ka të mirat dhe të këqijat e veta dhe se nuk është sistemi ai që krijon problemet në zgjedhjet shqiptare.
