Trajneri i kombëtares shqiptare Gianni De Biasi e ka bërë përsëri largimin në mënyrë demonstrative nga TVSH, teksa gazetari ishte duke e intervistuar pas humbjes turpëruese 3 me 0 me Izraelin.
Tekniku italian De Biasi u largua papritur sapo përfundoi përgjigjen, duke lënë në mes edhe fjalën e përkthyesit të tij.
Veprimi i De Biasit nuk i pëlqeu aspak gazetares së TVSH, Hygerta Sako, e cila tha se “të paktën trajneri i kombëtares duhet të kishte thënë mirupafshim”.
Kjo është hera e dytë që Gianni De Biasi shkakton incident të tillë gjatë transmetimit live të TVSH. Hera e parë ishte ndeshja me Spanjën, kur përsëri De Biasi u largua në mes të intervistës pas humbjes 2 me 0 me Spanjën.
