Qendra Rinore Sebastia, me seli në Laç-Kurbin, ka inicuar një peticion online në mbrojtje të “Urës së Zogut, objekt i trashëgimisë kulturore, i cili rrezikohet të shkatërrohet.
Përmes një deklarate kjo qendër njofton se institucionet shtetërore nuk po reagojnë lidhur me rrezikun që i kanoset këtij objekti.
“Plotësisht të vetëdijshëm se mbrojtja e trashëgimisë tonë është një detyrë qytetare dhe patriotike, gjykojmë se mbledhja e nënshkrimeve qytetare do të nxiste reagimin e institucioneve përgjegjëse në lidhje me hartimin dhe zbatimin e një plani emergjent për ndalimin e shkatërrimit të urës”, thuhet në deklaratën e Qendrës Rinore Sebastia.
Në vijim Qendra Rinore Sebastia kërkon të merren masa emergjentë për ndaljen e rrënimit të urës, si dhe të hartohet një projekt nga specialistët e fushës për mbrojtjen afatgjatë të kësaj vepre historike. Gjithashtu kërkojmë zbatimin e këtij projekti.
Kjo qendër thekson se në mënyrë të paligjshme kompani ndërtimi me lidhje deri në strukturat më të larta qeveritare kanë shfrytëzuar pa kriter shtratin e lumit Mat për të nxjerrë inerte.
Sipas deklaratës, zhavorri i lumit është përdorur për ndërtimin e rrugëve nga kompanitë e ndërtimit të lidhura me qeveritë, por zhavorri i lumit nuk është i përshtatshëm për përdorim për ndërtimin rrugësh, pasi në vend të tij duhet të përdoren inerte të gurta (bazalte), më koefiçentin e domosdoshëm të shtypjes e të fërkimit.
“Ura e Zogut do duhej të ishte një prej atraksioneve turistike në Qarkun Lezhë, ku shqiptarët kanë mundësi të njohin një pjesë të arkitekturës së viteve 30 në veprat publike.
Kjo urë është pjesë e memories së kombit, e përfaqëson një kohë kur orientimi i vendit ishte drejt Perëndimit, strehës natyrale të Shqipërisë.
Qeveria duhet të nxjerrë një vendim për ndalimin e kompanive të ndërtimit të shfrytëzojnë lumin Mat për nxjerrje inertesh.
SPAK duhet të nisë një hetim lidhur me këto kompani që prej 3 dekadash kanë abuzuar me këtë pasuri publike.
Shfrytëzimi i lumit Mat për ndërtim HEC-esh ka pasur jo pak impakt në degradimin e urës së Matit dhe veprave të tjera publike përgjatë këtij lumi”, theksohet në deklaratë.
Ura e Zogut është një nga asetet e trashëgimisë historike të Kurbinit, e shpallur Monument Kulture, e ndërtuar në vitin 1927, sot rrezikon shembjen.
“Mediat fajësojnë për këtë natyrën dhe prurjet e lumit Mat, të cilat përgjatë stinës së dimrit po shkaktojnë përmbytje masive në zonën e Bregut Matës, në Kurbin e Lezhë.
Urën mbi lumin Mat që dikur lidhte verilindjen me pjesën tjetër të vendit, nuk e shkatërroi natyra, por babëzia e bosëve të kompanive të ndërtimit që prej 3 dekadash, shfrytëzojnë këtë lum për të nxjerrë inerte për ndërtim.
Ajo urë është ndërtuar, projektuar nga një inxhinier italian dhe pothuajse e gjithë baza materiale u soll nga italianët.
Ura është ndërtuar brenda një viti dhe është një nga më të veçantat për strukturën e saj arkitekturore. Stili i harqeve i jep asaj vlera muzeale dhe arkitektonike të veqanta për kohën.
Tek rrëshqitjet e rrugëve gjatë përmbytjeve si në aksin Lezhë-Ungrej, apo në aksin Borsh-Sarandë gjeni edhe përgjigjen për rrënimin e Urës së Zogut”, thuhet në deklaratën e qendrës.
