Policia bën me dije se shtetasi Ervin Duka, 29 vjeç, banues në fshatin Guras, në Pogradec kishte në banesë lëndë plasëse dhe municione luftarake.
“Pas marrjes të informacionit të siguruar në rrugë operative, si edhe gjatë kontrollit që shërbimet policore ushtruan në banesën e këtij të fundit, iu gjetën e sekuestruan armatime”, njofton policia.
Atij iu sekuestrua një kallëp i dyshuar si lëndë shpërthyese tritol si edhe 89 copë fishekë model 54, kalibri 7.62mm, të cilat shtetasi i lartpërmendur i posedonte pa lejen e organeve kompetente.
Materialet për hetime të mëtejshme i kaluan Prokurorisë të Rrethit Gjyqësor Pogradec, për veprën penale: ”Prodhimi dhe mbajtja pa leje e armëve luftarake dhe e municionit” parashikuar nga neni 278 i Kodit Penal.
Kush është Ervin Duka
Ai është një prej dy shqiptarëve të plagosur në Siri që u kthyen në atdhe. Ai është rekrutuar dhe më pas është larguar nga Shqipëria më 8 shkurt 2013. Ky person është bërë pjesë e formacioneve ilegale kundërshtare të Bashar Al Assadit. Gjatë luftimeve me forcat e Asadit, shtetasi shqiptar është goditur nga një predhë në nofull dhe në trup duke marrë lëndime serioze për jetën.
Ervin Duka fillimisht është mjekuar në Turqi dhe më pas, me ndihmën e vëllait të tij, është dërguar në Larisa të Greqisë ku edhe po kurohet në një qendër mjekësore atje.
Emri i Ervin Dukes ndodhet në një raport që SHISH ka dërguar në prokurori për personat e rekrutuar në luftimet e Sirisë nga vendi ynë.
