Detaje të reja dalin në dritë nga ngjarja e rëndë që ndodhi mëngjesin e sotëm në një shkollë private në zonën e Don Boskos në Tiranë, ku si pasojë e rrjedhjes së gazit u helmuan disa nxënës.
Nxënësit shprehen se e kanë ndjerë erën e keqe të gazit që në orën e parë të mësimit, dhe kanë qendruar aty për 3 orë, derisa disa prej tyre nisën që të villnin. Ata shprehen se gazi ka rrjedhur nga kaldaja që përdorej për ngrohjen e klasave, dhe shtojnë se në shkollë janë nxënës të të gjitha moshave, përfshirë ato të kopshtit.
“Kaldajave u plasi gazi, unë jam në mimimaturë, jemi të gjithë aty, gjimnazi, parashkollor. Filluam që të ndjenim erën e keqe që në orën e parë të mësimit, më pas qendruam dhe tre orë të tjera me dritare hapur, aq sa disa prej shokëve dhe shoqeve nisën të villnin”, thuhet në dëshminë ekskluzive që ka siguruar Fax News nga një prej nxënëseve të mitura.
Burime nga pediatria e QSUT-së bëjnë me dije se dy prej fëmijëve janë duke u trajtuar me oksigjen, ndërkohë që gjendja e të tjerëve paraqitet më e mirë. Në oborrin e urgjencës së pediatrisë kanë mbërritur tashmë dhe familjarë të nxënësve që kanë pësuar helmim, të cilëve po iu merret dëshmia dhe nga punonjës të Policisë.
