Ditën e enjte do të luhet derbi i dytë i kryeqytetit për këtë sezon në Superiore. Partizani do të përplasen me bardheblutë e Tiranës në “Elbasan Arena”, në një ndeshje si gjithnjë të shumëpritur nga opinioni publik.
Partizani vjen në këtë derbi si forca e dytë e kampionatit, pasi renditet vetëm pas Vllaznisë, ndërsa Tirana është disa pozita më poshtë. Kundër Skënderbeut, Partizani arriti të rikthehet edhe te fitorja duke shkuar me moralin lart në Elbasan. Gjithashtu, të kuqtë kanë në dispozicion edhe Hektor Idrizajn, që shleu pezullimin e kartonëve në ndeshjen kundër Skënderbeut.
Edhe Stenio Junior dhe Valentino Murataj, të cilët debutuan në Korçë, do të jenë në dispozicion të Ilir Dajës, më të freskët dhe më të ambientuar me skuadrën.
Gjatë këtyre ditëve, pritet dhe rikthimi i brazilianit Lukas Kardozo, që pasi mungoi në dy seanca stërvitore për probleme personale, pritet të jetë pjesë e grupit. Mund të themi se Partizani vjen si ekipi favorit përballë Tiranës, por në ndeshjet derbi, të papriturat janë gjithmonë prezente.
Formacioni i mundshëm i Partizanit:
Partizani (4-3-3): Hoxha, Idrizaj, Bitri, Belica, Hakaj, Bardhi, Mala, Murataj, Asani, Solomon, Zhunior. Trajner: Ilir Daja.
