Katër persona janë arrestuar lidhur me ngjarjen e ndodhur një ditë më parë në rrugë “Ndre Mjeda” në Tiranë, ku u plagosën me armë zjarri dy persona dhe u dëmtua me sende të forta një tjetër.
Mes të arrestuarve është dhe biznesmeni që u plagos, Sino Llanaj, i cili akuzohet për veprat penale “Goditja për shkak të detyrës” dhe “Moskallëzimi i krimit”.
Të arrestuarit e tjerë janë:
- A.A., 53 vjeç, për veprën penale “Moskallëzim i krimit”;
- Sh.B., 41 vjeç, për veprat penale “Mbajtja pa leje e armëve të ftohta” dhe “Moskallëzimi i krimit”;
- S. M., 52 vjeç, dhe A. L., 48 vjeç, për veprën penale “Moskallëzim i krimit”;
- Si dhe u procedua në gjendje të lirë shtetasi K. K., për veprën penale “Veprime që pengojnë zbulimin e të vërtetës”.
Ngjarja
“Në përfundim të veprimeve të para hetimore, ka rezultuar se Sino Llanaj, së bashku me persona të tjerë, ka shkuar në kompleksin në rrugën ‘Ndre Mjeda’, ku janë konfliktuar fizikisht me rojet e sigurisë duke përdorur sende të forta dhe armë zjarri. Policia ka bërë të mundur identifikimin e njërit prej shtetasve (për arsye hetimore nuk bëhen të ditura gjeneralitetet e tij), i cili ka qëlluar me armë zjarri. Po punohet për kapjen e tij”, thuhet në njoftimin e policisë.
Burime zyrtare pohuan se janë sekuestruar në cilësinë e provës materiale një sasi municioni, një armë e ftohtë dhe 5 aparate celular.
