Sipas dëshmive të para kjo ishte një tragjedi që mund të ishte shmangur nëse do të ishin marrë parasysh paralajmërimet e punonjësve për një valvul shkarkimi e cila nuk punonte.
Edhe Kryetari i Bashkisë së Mallakastrës, Agron Kapllanaj tha se nga bisedat që ka pasur me një prej teknikëve në rafineri, dyshohet që shkak për shpërthimin të jetë bërë valvula që shkarkonte.
“Ka qenë e shkruar në procesverbal 3-4 ditë më parë, ishin njoftuar edhe eprorët, që valvula nuk punonte dhe shkarkonte. Ishte rritur presioni në maksimum dhe në atë moment ka shpërthyer”, – tha ai.
Valvula dyshohet të ishte e një pompe hidrogjeni. Kryebashkiaku i Mallakastrës tha se shpërthimi ka qenë mjaft i fuqishëm, dhe se ka ndodhur në repartin numër 3 të uzinës.
Një shpërthim i fuqishëm ndodhi në qendër të uzinës së përpunimit të naftës në Ballsh që i mori jetën një punëtori 40-vjeçar. Vitima është Shkëlqim Muça nga Ballshi. Të plagosur kanë mbetur 5 persona, njëri prej tyre në gjendje të rëndë për jetën.