Mbrojtësi i Napolit, Kostas Manolas, duket se do të qëndrojë jashtë fushave për disa kohë. Greku pësoi një dëmtim në fitoren e së dielës kundër Udinezes dhe ka qenë vetë klubi napoletan që ka konfirmuar lajmin përmes një deklarate zyrtare.
“Kostas Manolas, i cili u zëvendësua pas 15 minutash në Friuli kundër Udinezes, iu nënshtrua kontrolleve këtë mëngjes në klinikën Pineta Grande. Përgjigjet treguan se aj ka një dëmtim muskular të shkallës së parë”, shkruhet në deklaratën e Napolit.
Mesa duket tashmë Gennaro Gattuso do të ketë nevojë për mbrojtësin e kombëtares sonë, Amir Rrahmanin, të cilin e zëvendësoi në pushimin e pjesës së parë në fundjavë për shkak të gabimit te goli i parë. Napoli do të ndeshet nesër kundër Empolit në ndeshjen e vlefshme për Kupën e Italisë si dhe të dielën kundër Fiorentinës në Serie A.
