Ish-kryetari i Këshillit të Qarkut në Kukës, Abedin Oruçi, i ka nxjerrë armën punonjësve të Policisë, dhe ka dëmtuar disa prej tyre, teksa ia ka mbathur me makinën e tij.
Oruçi i cili ishte shpallur në kërkim për 3 vepra penale, ka bërë rezistencë ndaj ndalimit, dhe pasi ka përplasur punonjësit e Policia ka arritur të largohet nga vendi i ngjarjes.
Lidhur me këtë akt të rëndë kanë nisur hetimet, ndërsa në vendngjarje kanë mbërritur dy prokurorë të Kukësit, raporton Faxnews.
Oruçi dyshohet për veprat penale “Kundërshtimi i punonjësit që kryen një detyrë shtetërore ose një shërbim publik”, ” Kanosja për shkak të detyrës” si dhe ndërtim pa leje.
Abedin Oruci ka garuar në zgjedhjet vendore të 30 qershorit 2019 si kandidat i Bindjes Demokratike.
“Më datë 20.10.2020, Prokuroria pranë Gjykatës së Shkallës së Parë Kukës, ka nxjerrë urdhër ndalimi për shtetasin A.O., 54 vjeç, banues në Kukës, i dyshuar për veprat penale “Kundërshtimi i punonjësit që kryen një detyrë shtetërore ose një shërbim publik”, ” Kanosja për shkak të detyrës” si dhe “Pushtimi i tokës” . Po punohet për kapjen e shtetasit A.O.”, njoftonte policia.
