“Le të digjet në ferr!” Kjo është shprehja e famshme e Donald Trumpit, që dje u zyrtarizua president i SHBA, të cilën mësohet se e ka përdorur në tërbim e sipër ndaj Arsene Wenger, teksa trajneri francez nuk po fitonte me klubin e “topçinjve të Londrës”, të cilin e simpatizon multimiliarderi amerikan.
Sikurse bëjnë me dije mediat franceze ditën e sotme, Donald Trump e urren trajnerin e Arsenalit dhe nuk i ka fshehur shpërthimet kundër tij.
Në atë kohë, Trump e kishte quajtur Wengerin një “klloun” , duke mos hezituar fare të deklarojë edhe se trajneri francez “duhet të digjet në ferr.”
Tashmë president i SHBA, Trump tha asokohe se ishte i gatshëm edhe të paguante një trajner të ri për 50 vitet e ardhshme, vetëm që Wenger të largohej nga Arsenali e la linte të qetë.
Të enjten, ky lajm u përhap në rrjetet sociale dhe internet, kaloi nga shtypi britanik dhe amerikan në vende të tjera. Donald Trump definohej si një “mbështetës i vërtetë i Arsenalit, një “topçi” i vërtetë”: “Wenger ka lënduar aq shumë shpirtra në botë, përfshirë edhe timen. Ky njeri e udhëheq klubin prej dy dekadash, e trajton sikur t’i përkiste vetëm atij, bën çfarë dëshiron me të. Arsenali duhet riorganizuar. Dhe nëse klubi dëshiron të holla, unë jam i gatshëm të paguaj një trajner të ri për 50 vjet, me kusht që Wenger të largohet nga Arsenali dhe të na lërë në paqe. Wenger mund të digjet edhe në ferr.”
Donald Trump nuk është një tifoz i futbollit në vendin e tij, ku futbolli amerikan, bejsbolli dhe basketbolli janë mbreti.
Në vend të tyre, ai është një tifoz i vërtetë golfi, teksa ka investuar një pjesë të pasurisë së tij në topin e vogël të bardhë, sidomos në Skoci, dhe është mbështetur edhe nga shumë lojtarë profesionistë amerikanë gjatë fushatës së tij elektorale për kreun e Shtëpisë së Bardhë.
