Ka nisur me debate seanca e sotme parlamentare. Duket se përmbytjet ishin tema kryesore që krijoi debat në parlament. Nënkryetari i PD dhe i parlamentit, Edmond Spaho, tha se Edi Rama dhe ministrat e tij nuk kishin shkuar asnjë ditë në asnjë vend të përmbytur për të parë situatën nga afër.
Kjo deklaratë ka bërë që deputeti Eduard Shalsi të shpërthejë në kritika ndaj Ilir Metës për mënyrën e drejtimit të Parlamentit.
Shalsi i kërkoi Metës që të vendoste rregull në parlament dhe të respektonte rendin e ditës. “Nuk mund të vazhdohet kështu. Ose hiqni nga ekrani projektligjin dhe ta vendosim si diskutime të lira”, tha ai duke iu drejtuar Metës. Edhe herë të tjera Shalsi ka patur kritika, por Meta nuk i ka marrë ato asnjëherë seriozisht. Në parim edhe ai ka kërkuar vazhdimisht që të respektohet rendi i ditës dhe rregullorja e Parlamentit.
