Një prej sirianëve të kapur mbrëmjen e djeshme në grykëderdhjen e Vjosës ka treguar për mediat se destinacioni i tyre ishte kalimi drejt Italisë e më pas në vendet e Europës.
Ai thotë se sirianët e shpëtuar nga gomonia që rrezikonte të mbytej, kanë qëndruar për 3 orë në det të hapur.
“Kam ardhur me motrën dhe djalin e saj. Jemi shumë të frikësuar. Kemi qëndruar 3 ditë. Donim të iknim në Europë. Paratë i ka paguar im vëlla, nuk e di sa lek ka paguar, ne donim të shkonim në Itali ….në Europë , kudoqoftë. Kemi qëndruar për rreth 3 orë në det”, thotë siriani.
Në gomonen me 50 klandestinë kishte gra, burra dhe fëmijë. Emigrantët ndodheshin në një gomone, ndërsa pisnin të ikin drejt Italisë. Pavarësisht kushteve mjaft të vështira atmosferike dhe me një det mbi 5 ballë, gomonia ishte gati për t’u nisur për në Itali.
“Gomonia po mbytet, ndihmë”, ishte telefonata që vuri në lëvizje policinë e Vlorës mbrëmjen e së premtes, edhe pse thuhet se grupi që do të realizonte trafikimin e 50 sirianëve ishte nën përgjim.
Klandestinët qëndruan rreth 3 orë në det të hapur. Shumë prej tyre në gjendje të rëndë shëndetësore i janë drejtuar spitalit Rajonal të Vlorës.
16 persona morën ndihmë të specializuar në Spitalin Rajonal të Vlorës, ndërsa 9 burra dhe gra u nisën drejt Spitalit të Traumës, mes tyre tre fëmijë nën moshën 10 vjeçare.
