Kreu i AK-së në qytetin e Kvajës ka akuzuar kryetarin e Bashkisë së Kavjës Elvis Roshi dhe Ergys Hoxhën si të dyshuarit kryesorë për vënien e tritolit në banesën e tij. Ditën e martë një sasi tritoli shpërtheu në hyrje të banesës të Dritan Kanaparit në Kavajë.
Nga shpërthimi pati vetëm dëme materiale dhe jo persona të lënduar. Në një intervistë për “GSH”, Kanapari thotë se ky nuk është kërcënimi i parë që ai dhe familja e tij kanë marrë.
“Këtë gjë e kanë bërë për të më kërcënuar. I dyshuari kryesor për mua është kryetari i Bashkisë Kavajë Elvis Roshi dhe Ergys Hoxha. Këtë e di edhe policia dhe ulën kokën. Të zbardhet sa më shpejt. Ne nuk do tërhiqemi. Do ta vazhdojmë betejën deri në fund. Unë jam i dekoruar si “Pishtar i Demokracisë”, si protagonist në lëvizjet e para antikomuniste dhe kam qenë i arrestuari i parë në qytetin e Kavajës, më 29 janar 1990. Një vit e gjysmë më parë më kanë shembur banesën dhe ka qenë haptas një shembje për arsye politike. Unë kam mbështetur kandidatin opozitar të PD-së. Aty filluan edhe kërcënimet, sepse unë administroj një faqe që quhet “Buletini i Kavajës”. Jo, nuk kam bërë denoncim. Nuk ka qenë nevoja të bëja denoncim, sepse unë isha një njeri gjysmë publik, përderisa shkruaja në portalin tim. Pastaj, ku mund të bëja unë kërcënim kur ata të gjithë janë të shtetit?” – ka thënë i dëmtuari.
