Kryetarja e LSI-së, Monika Kryemadhi, deklaroi në Çim Peka LIVE se nuk ka ndonjë emocion kur sheh lajmet për largimin e ish-ministrit Nasip Naço drejt PS-së.
“Të gjithë ne duhet ta kuptojmë se asnjë prej nesh nuk është i përjetshëm. LSI është një parti që ecën shpejt dhe që të ecësh me ritmin e saj, duhet të ecësh me moton e saj. LSI është parti e të rinjve dhe të rejave.
Ne duhet ta kuptojmë se asnjë parti nuk është e jona, as e Ilir Metës. Është e të rinjve dhe të rejave. Është e vetmja parti që rritet. Është e vetmja parti që në katër palë zgjedhje ka prodhuar personazhe politike,” tha ajo.
Sipas saj, fushatën e LSI-së në Durrës do e udhëheqë Elona Guri.
“Ditën që Elona Guri është bërë koordinatore e qarkut të Durrësit, Edi Rama deklaroi se nuk do të garojë në Durrës, por në Vlorë. Delegimi i Elona Gurit në Durrës pati efekt pozitiv,” tha ajo, duke shtuar se kjo ka sjellë rritje të partisë.
“Mendoj se Edi Rama e ka shumë frikë Elona Gurin politikisht. Qarku i Durrësit do jetë një nga surprizat e LSI-së”.
