Kryeministri Edi Rama e quajti provokim qesharak dhe të papërshtatshëm postimin e ambasdës ruse në rrjetet sociale, me atë të cilit ofroi vaksinën ruse kundër koronavirusit për Shqipërinë.
I pyetur, “a do ti përgjigjeni potivisht gadishmërisë së ambsadës ruse në vendin tonë, për të marrë vaksinën ruse”. Rama u shpreh:
“Mendova që ka qenë një meme ajo që pashë që ambasada e Rusisë kishte postuar nga Twitteri i drejtorit të komunikimit të kryeministrisë. Sepse për një shtet serioz është krejtësisht e papërshtatshme që të bëjë provokimet ë tilla, kur them provokim nuk po i paraprij ndonjë demarshi pranë shtetit rus, sepse ky është një provokim qesharak dhe nuk është mirë që një vend serioz si Rusia të bëhet qesharak me këto lloj postime dhe një ambsadë e rëndësishme në vendin tonë si ajo ruse të kthehet në një konkurrent të Protokallisë. Nuk shoh arsye se pse Ambasada e Rusisë të përfshihet në prodhimin e memeve”.
Rama tha se qeveria aktualisht në bisedime me tre kompani farmaceutike, të cilat kanë prodhuar vaksina.
Postimi i ambasadës ruse
“Nuk kemi dyshime se Rusia është e gatshme të sjellë vaksinën e saj “Sputnik-V” edhe në Shqipëri. Vaksinimi me “Sputnik-V” tashmë filloi në Rusi dhe në Argjentinë, ndërkohë më shumë se 50 vende kanë aplikuar për të blerë 1,2 miliardë doza të preparatit”, ka shkruar dje në rrjetin social FB, Ambasada e Rusisë në Shqipëri.
Diplomatët rusë e kanë ndërlidhur këtë ofertë me një postim të drejtorit të zyrës për Komunikim me Publikun, në Qeverinë e Shqipërisë, Endri Fuga, në të cilin ai e quan lajm të mrekullueshëm fillimin e shpërndarjes së vaksinës kundër koronavirusit të kompanisë Pfizer BioNtech, në vendet e Bashkimit Evropian.
Në atë postim, Fuga thotë se “e gjithë popullata e vendeve të Ballkanit Perëndimor mund të krahasohet me atë të një vendi anëtar të BE-së”, duke shtuar se në pandemi BE-ja mund të jetë e sigurt nëse janë edhe fqinjët e saj.
