26 dënime deri në 9 vite burg janë dhënë sot nga gjyqtarja e gjykatës së Milanos në Itali, Sofia Fioretta, për personat e përfshirë në një trafik ndërkombëtar droge.
Për 14 nga të pandehurit është aplikuar gjykimi i shkurtuar (duke përfituar uljen e 1/3 së dënimit). Edhe për 12 të tjerë është aplikuar po një ulje dënimi.
Në prill të këtij viti, në kuadër të operacionit të koduar “Dexter”, që u zhvillua në provincat italiane të Milanos dhe Monza Brianza, me kërkesë së prokurorisë, gjykata ka dhënë 31 urdhër arreste, nga të cilat 29 me burgim dhe (19 italianë dhe 10 shqiptarë) dhe dy (italianë) me arrest shtëpiak. Më 27 prill, 27 persona janë arrestuar. Dy nga shqiptarët A.P., 32-vjeç dhe A.N., 44-vjeç u arrestuan në Shqipëri, ka njoftuar Policia e Shtetit.
Operacioni ka shkatërruar dy banda, një shqiptare dhe një italiane, që në bashkëpunim, importonin hashash dhe kokainë nga Afrika Veriore dhe Holanda, për në Itali.
Mes personave të dënuar është edhe Carla Martelli, 67-vjeçe, ish fotomodele dhe ish-partnerja e Pino Di Girolamo, një nga anëtarët e bandës “Vallanzasca”. Ajo është dënuar me 6 vite burgim.
Dy nga të arrestuarit kanë zgjedhur gjykimin e zakonshëm. Ndërsa, dy të tjerë, një shqiptar dhe një italian janë në kërkim. Për një tjetër shqiptar, është kërkuar arkivimi i dosjes ndaj tij, për të vijuar me hetimet.
Pas aksionit të 27 prillit, kreu i sektorit operativ të Policisë së Milanos, Serena Ferrarri u shpreh “se operacioni Dexter zbardhi veprimtarinë kriminale të një organizate të rëndësishmen në trafikun ndërkombëtar të drogës, e përbërë nga dy grupe në lidhje të forta mes tyre.
Grupi kryesor është ai i përbërë nga kriminelë shqiptarë që merreshin kryesisht me importimin e kokainës, drejtpërdrejt nga Vendet e Ulëta, duke e shpërndarë më pas në Itali me anë të grupit të italianëve. Kemi të bëjmë me një nivel të lartë organizimi kriminal i shtrirë dhe në Vendet e Ulëta duke mundur të administrojnë trafikimin e kokainës përmes portit të Roterdamit e më pas drejt Italisë”.
Hetimet e operacionit Dexter, zbardhën aftësinë e grupeve kriminele shqiptare për t’i bërë konkurrencë dhe mafies kalabreze në trafikun e kokainës. Shqiptarët mundnin të importonin në Itali kokainë të cilësisë mjaft të pastër duke e çuar çmimin e shitjes deri nën 40 mijë euro për kilogram, ndërsa kalabrezët nuk arrinin kurrë nën 39 mijë euro për kg, për një cilësi më të ulët droge se ajo e importuar nga shqiptarët.
Kokaina transportohej me anë të automjeteve të rënda që kalonin përmes portit të Roterdamit duke u fshehur mes mallrave e pas pagesës që drejtuesit e tyre kishin marrë nga trafikantët shqiptarë. /Syri.net/
