Autoritetet amerikane besojnë se një shpërthim që tronditi zonën në qendër të qytetit Nashville mëngjesin e Krishtlindjes ishte një veprim i qëllimshëm.
Zëdhënësi i policisë së qytetit Nashville të shtetit Tenesi tha se nga shpërthimi që ndodhi në orën 6:30 të mëngjesit u thyen xhama dhe u dëmtuan ndërtesa. Autoritetet besojnë se në shpërthim ishte i përfshirë një automjet. Policia tha se tre njerëz u dërguan në spital, asnjëri prej tyre në rrezik për jetën.
Policia tha gjithashtu se ka nisur një hetim në shkallë të gjerë.
Nashville, 25 dhjetor 2020
Zona ku ndodhi shpërthimi është e mbushur me bare, restorante, dyqane të vogla dhe njihet si zemra turistike e qytetit.
Disa dëshmitarë thanë se zhurma e shpërthimit ishte e fortë dhe ndërtesat përreth u tronditën. Veç kësaj, u panë katër automjete në flakë ndërsa pemët në vendin e ngjarjes u shkatërruan.
Shtëpia e Bardhë tha se Presidenti Donald Trump është informuar për shpërthimin në Nashville dhe se do të vazhdojë të marrë përditësime të rregullta./VOA/
