Gazeta e njohur zvicerane, Neue Zuercher Zeitung, komenton zhvillimet e fundit politike në Kosovë.
Si gazeta më me ndikim në Zvicër, ajo thekson se demokracia në Kosovë po funksionon më mirë se në Shqipëri dhe në Serbi.
“Krahasuar me Serbinë dhe Shqipërinë, ndryshimi demokratik i pushtetit në Kosovë funksionon më mirë. Kjo ka të bëjë me një shoqëri civile rebele,” shkruan analisti Andreas Ernst.
“Kur e krahason Kosovën me vendet fqinje, Shqipërinë dhe Serbinë, vërehet se demokracia funksionon më mirë në ish-protektoratin. Në Beograd dhe Tiranë janë instaluar autokratët që dominojnë parlamentin, gjyqësorin dhe mediat aq shumë sa ndryshimi i pushtetit nuk është i mendueshëm.
Edhe në Kosovë, gjyqësori është i dobët dhe i pafuqishëm. Por vendime si ai i të hënës, janë gjithmonë të mundshme, falë të cilave çështja e pushtetit mund të shtrohet sërish për diskutim.
A lidhet kjo me trashëgiminë e protektoratit perëndimor? Kjo nuk mund të përjashtohet. Por diçka tjetër është vendimtare. Me Vetëvendosjen, ekziston një parti, mesazhi i së cilës mbledh të pakënaqurit dhe i mobilizon ata vazhdimisht kundër forcave në pushtet. Ata e kanë bërë këtë prej vitesh. Një shoqëri civile po rritet këtu më e fortë se në vendet fqinje”.
