Britania zyrtarisht u largua nga Bashkimi Europian në 31 janar pas referendumit të saj në 2016, por që nga ajo kohë ajo ka qenë në një periudhë tranzicioni nën të cilën rregullat për udhëtimin e lirë dhe tregtinë mbeten të pandryshuara. Kjo periudhë përfundon më 31 dhjetor.
Katërmbëdhjetë vende europiane, duke përfshirë Portugalinë dhe Spanjën, do t’u japin britanikëve që mbërrijnë para 31 dhjetorit të drejtën për pesë vjet qëndrim. Vendet e tjera kanë kërkesa më të ashpra pas Brexit, duke u kërkuar të gjithë britanikëve që të riaplikojnë pas periudhës së tranzicionit.
Vendet të cilat kanë vënë re një rritje të shtetasve britanikë janë Spanja dhe Portugalia. Regjistrimet për leje qëndrimi janë rritur ndjeshëm krahas përfundimit të afatit të tranzicionit.
Në Portugali, 1,453 persona, më shumë se dyfishi i rekordit të mëparshëm të regjistrimeve mujore, u regjistruan për të qëndruar në mars 2019, data kur Britania fillimisht duhej të largohej nga Bashkimi Europian. Të dhënat e përkohshme për nëntorin tregojnë se shifra ishte 2,407.
Në Spanjë, numri i britanikëve me një leje qëndrimi u rrit 8.2% nga qershori 2018 në 2019 dhe një tjetër 5.8% në qershor 2020, gjithsej 366,498 njerëz.
Disa nga këta janë banorë afatgjatë të cilët kishin neglizhuar regjistrimin, por punëtorët e këshillit lokal, agjentët privatë dhe Ambasada Britanike në Portugali thanë se shumë prej tyre ishin të sapoardhur.
Për britanikët që humbasin afatin e 31 dhjetorit, lëvizja në një vend europian do të nënkuptojë respektimin e rregullave për emigrantët jo të BE, ndoshta duke përfshirë vizat e sponsorizuara të punës. /Reuters
