Lavezzi: “Nuk më pëlqente të luaja në Ligue 1”

Ezequiel Lavezzi pranon se ka patur vështirësi të motivonte veten e tij teksa luante për Paris Saint-Germain për shkak se ekipet e tjera nuk arrinin as të ‘gërvishtnin’ klubin kryeqytetas. Pas fitores 9-0 ndaj Troyes të dielën PSG fitoi kampionatin e katërt radhazi ku mbeten edhe tetë ndeshje për të luajtur, si dhe ka 25 pikë diferencë me vendin e dytë Monaco. Lavezzi la Parisin për tu transferuar tek Hebei China Fortune në shkurt dhe ka zbuluar se të luajturit në kampionatin elitar të Francës ishte jo motivuese për shkak se nuk kishte konkurrencë. “Nuk më pëlqen Ligue 1. Nuk më motivon, kjo është e vërteta. PSG është shumë e fortë në krahasim me ekipet e tjera. Nuk marr kënaqësi prej këtyre ndeshjeve. Italia është ndryshe, ke tetë ndeshje të forta në sezon ndërsa në Francë vetëm dy.” Lavezzi gjithashtu fajëson natyrën e njëanshme të Ligue 1 për nivelin e ulët të performancës së tij pasi iu bashkua Paris Saint-Germain nga Napoli në 2012. Ai shtoi: “Koha kalonte, unë humbja motivimin, rrjedhimisht edhe vendin e titullarit. Kur luan për Paris Saint-Germain duhet që gjatë gjithë kohës të ecësh përpara, gjë që nuk e bëja gjithmonë. Përveç se në Champions League, ku vazhdoja të ndihesha i motivuar.”