Europa këtë vit po i pret festimet e Krishtlindjeve mes kufizimeve, me shumë vende që po marrin masa paraprake për të frenuar përhapjen e COVID-19.
Dje, OBSH tha se transmetimi i COVID-19 në të gjithë rajonin europian vazhdon të jetë gjerësisht i përhapur dhe intensiv, duke kërkuar mbajtjen e maskave në tubimet familjare të Krishtlindjes.
Gjermani
Ndërsa Gjermania po regjistron shifrat më të larta të viktimave dhe rasteve të infektimit, vendi hyri dje në një bllokim më të rreptë, duke mbyllur dyqanet jothelbësore, shkollat dhe kopshtet e kujdesit ditor.
“Megjithatë anëtarët e afërt të familjes do të mund ta kalojnë Krishtlindjen së bashku, edhe pse me kufizime, me deri në katër persona nga familje të tjera”, njoftoi të dielën kancelarja gjermane, Angela Merkel.
Franca
Të martën, Franca hoqi kufizimet e bllokimit të vendosur në fund të tetorit, megjithatë la në fuqi shtetrrethimin e natës.
Udhëtimi gjatë orëve të shtetrrethimit do të lejohet vetëm për punonjësit e shëndetësisë dhe personat me leje paraprake nga autoritetet lokale.
Mbajtja e maskave në të gjitha hapësirat e brendshme dhe të jashtme po ashtu do të mbetet e detyrueshme.
Italia
Qeveria italiane ende po diskuton masa më të rrepta antiCOVID-19 për festat e ardhshme, duke ndjekur shembullin e Gjermanisë dhe të partnerëve të tjerë europianë, në një përpjekje për të shmangur një valë të tretë të pandemisë në fillim të vitit të ardhshëm.
Britania e Madhe
BM po përgatitet për kufizime më të qeta, edhe pse Londra hyri dje në masat e “nivelit 3”, me kufizime më të rrepta.
Do të ndalohet grumbullimi i më shumë se gjashtë personave, si edhe shoqërimi në hapësira publike, ndërsa banorët nuk do të mund të takohen brenda ose jashtë shtëpive të tyre nëse nuk janë nga e njëjta shtëpi.
Numri i të vdekurve nga COVID-19 në BM ka arritur në 69 908, shifra më e lartë në Europë.
Holanda
Holanda njoftoi një bllokim të dytë deri më 19 janar të vitit 2021, për shkak të rritjes së infektimeve me COVID-19.
Sipas masave të reja të njoftuara nga kryeministri Mark Rutte, vetëm dyqanet thelbësore do të qëndrojnë të hapura gjatë mbylljes pesëjavore.
Gjithashtu, ai i bëri thirrje publikut të shmangë udhëtimet jothelbësore brenda dhe jashtë vendit.
Spanja
Duke reaguar ndaj rritjes së re të numrit të rasteve, kryeministri Pedro Sanchez paralajmëroi se mund të ketë ndryshime të minutës së fundit në lidhje me masat paraprake gjatë festave.
“Nëse duhet ta bëjmë planin më të rreptë, mos dyshoni, qeveria qendrore do t’u kërkojë qeverive rajonale të shtrëngojnë masat”, tha ai në një seancë të tensionuar parlamentare.
/ata/
