Dy persona kanë rënë në prangat e policisë për kontrabandë me mallra për të cilat duhet të paguhet akcizë.
Njëri prej të arresturve është me detyrë doganier në Doganën e Qafë Thanës.
“Specialistët për Hetimin e Krimeve në Komisariatin e Policisë Pogradec, në vijim të punës për goditjen e aktivitetit kriminal të kontrabandimit të mallrave, arrestuan në flagrancë shtetasit: G. J., 45 vjeç dhe V. B., 51 vjeç (me detyrë doganier në Doganën e Qafë Thanës), të dy banues në Pogradec”, njoton policia.
Të njëjtat burime shtuan se gjatë kontrolleve të kryera në lagjen nr.1, Pogradec, në mjetin furgon tip “Benz”, me drejtues shtetasin Genti Jesku, efektivët e policisë zbuluan një sasi me material ndërtimi, naftë dhe dy kuti me fruta, të cilat dyshohet se janë kaluar nga Pika e Kalimit Kufitar Qafë-Thanë. Ndërkohë që doganieri Vladimir Bardhi, dyshohet se ka shpërdoruar detyrën duke mos kryer procedurën e zhdoganimit.
Sakaq mallrat e dyshuar janë sekuestruar në cilësinë e provës materiale.
Materialet në ngarkim të tyre i kaluan Prokurorisë Pranë Gjykatës të Rrethit Gjyqësor Pogradec për veprat penale “Kontrabanda me mallra për të cilat paguhet akcizë”, “Kontrabanda me mallra të tjera”, “Kontrabanda nga punonjës që lidhen me veprimtarinë doganore”, njoftoi policia.
