Të mos jesh në gjendje të kesh fëmijë është një situatë pikëlluese për të gjithë ata që duan të kenë fëmijë.
Por në Indi, infertiliteti mbart një njollë të shtuar për gratë, të cilat mund të dëbohen nga familjet dhe shoqëria e tyre për shkak të pamundësisë për të bërë fëmijë.
Kur Saalumarada Thimmakka dhe burri i saj Sri Bikkala edhe pas 25 vitesh martesë nuk kishin ende fëmijë, ajo ia doli të ngushëllohej në një mënyrë interesante, transmeton Gazeta Express.
Ajo mbolli qindra pemë, i ujiti dhe u kujdes për to sikur të ishin “fëmijët e saj”. “Ishte fati im që të mos kisha fëmijë”, tha ajo për CNN. “Për shkak të kësaj, ne mbollëm pemë dhe i rritëm ato. Ne i kemi trajtuar pemët si fëmijët tanë”, shtoi ajo.
Thuhet se kjo grua ka mbjellë rreth 300 pemë, duke krijuar një pyll të vërtetë i cili shtrihet për katër kilometra në të dyja anët e rrugës nga fshati i saj deri tek një fshat tjetër.
