Prokuroria e Tiranës ka ndryshuar akuzën e ngritur ndaj punonjësit të Policisë Nevaldo Hajdaraj, i cili vrau të riun Klodian Rasha me armën e shërbimit, një javë më parë në Tiranë. Tashmë Hajdaraj do të përballet me akuzën “vrasje me dashje”, dhe jo “vrasje në kapërcim të kushteve të vetëmbrojtjes”, e cila ishte akuza e ngritur fillimisht.
Shkak për ndryshimin e kësaj akuze është bërë fakti se Hajdaraj ka qëlluar dy herë me armë në drejtim të Rashës, dhe mes tyre nuk ka pasur një konfrontim që mund të justifikonte faktin e veprimit në kushtet e vetëmbrojtjes, thanë burime nga prokruoria.
Prokuroria këmbëngul në versionin e saj se mes dy personave nuk ka pasur konflikt fizik, dhe fakti që Polici ka qëlluar dy herë, është në shkelje të plotë me ligjin e përdorimit të armëve nga punonjësi i Policisë.
Sipas Prokurisë, nga kqyrja e kamerave të sigurisë, që sipas burimeve janë 60 të tilla, në aksin ku është zhvilluar ngjarja, tabloja e veprimeve të të dy personave është e qartë, dhe nuk lë vend për dyshime.
Filmimi tregon se polici ka qëlluar nga një pozicion i shtrirë, drejt Klodian Rashes. Këndi i goditjes se Klodian Rashes, ka qenë në gjatësinë e trupit të viktimes. Filmimi ka zbuluar se Klodian Rasha, është qëlluar nga polici teksa ishte duke u larguar me vrap në rrugicën që të çon në banesën e tij.
Ndërkohë, ajo që mbetet pa u konfirmuar ende, është arma që u gjet pranë vendit të ngjarjes, e që sipas Policisë, në njoftimin fillestar, thuhej se “dyshohet se i përkiste Rashës”. Për ekspertët është bërë i vështirë identifikimi i gjurmëve të gishtave, për shkak se arma ka qëndruar pak kohë në një pellg me ujë dhe gjurmët janë fshirë.
Efektivi Nevaldo Hajdaraj ndodhet në qeli, nën masën e sigurisë arrest me burg.
