Nga Boldnews.al
Kryeministri Edi Rama e ka përcaktuar zyrtarisht dhe juridikisht akuzën ndaj policit të repartit Shqiponja Nevaldo Hadëraj, i cili vrau me armën e shtetit Klodjan Rashën. Për kreun e qeverisë “vrasja ishte aksidentale”… Këtë e përcaktoi në vendimin për ti lidhur një pension prej 61 mijë lekësh në muaj babait të Klodjanit. Jeta e humbur e 25-vjeçarit vlen 2000 lekë dita.
“Qeveria vendosi dhënien e trajtimit të veçantë familjes të të ndjerit Klodian Rasha, i cili, në datën 8.12.2020, humbi jetën aksidentalisht, si pasojë e veprimeve policore, në masën e tetëfishit të pensionit social. Trajtimi i veçantë familjar, financiar mujor, i paguhet kryefamiljarit z. Qazim Osman Rasha”, thuhet në vendimin e qeverisë.
Me këtë gjykim, vrasje aksidentale mund të quhet e tillë: “Polici po ecte rrugës i qetë dhe nxorri armën nga brezi për ta kontrolluar nëse e kishte vënë në siguresë apo jo. Ndërsa ecte, efektivi Nevaldo Hajdëraj u rrëzua dhe kreu shkrepje të pavullnetshme. Plumbit i doli “gabimisht” përpara Klodjan Rasha dhe aty gjeti vdekjen në mënyrë aksidentale”. Kjo mund të jetë përkufizimi i përafart i “vrasjes aksidentale”.
Pra sipas qeverisë sonë ishte një aksident dhe jo minimalisht “vrasje e kryer në kapërcim të kufirit të vetëmbrojes së detyruar”. Po kush është Rama për ta përcaktuar ngjarjen si aksidentale? Në fakt askush nuk duhet të ketë dyshim se si në këtë rast, ashtu edhe në shumë raste, ai është kryehetues, kryepolic, kryeekspert i balistikës, apo çdo krye tjetër…
Përtej vendimit për lidhjen e pensionit, aty fshihet edhe një akt i rëndë që detyrimisht do të ndikojë në vendimin e gjykatës në vijim. Kur kreu i qeverisë e cilëson vdekje aksidentale, atëherë edhe gjykata e frustruar, e trembur për shkak të vetingut do t’i bindet “kryehetuesit” Rama, që e përcakton si aksidentale.
Problem janë kamerat që kanë filmuar gjithçka në atë krim të rëndë ku Klodjan Rasha u vra rreth 100 metra larg portës së shtëpisë së tij vetëm se kishte thyer orën policore dhe nuk iu bind urdhrit për të ndaluar. U qëllua me dy plumba pas shpine, çka i shkaktuan vdekjen e menjëhershme. Nëse nuk do ishin ato kamera që kanë filmuar një pjesë të mirë të të gjithë ngjarjes tragjike, mund të krijohej çdolloj fabule.
Do të bëhej përgjegjës viktima, ashtu sikurse u tentua në komunikatën e parë të Policisë së Shtetit që e bëri fakt të kryer se viktima ishte i armatosur, më vonë e konsideruan e dyshohet se ishte i armatosur dhe më pas u justifikuan se arma që u gjet më shumë se 100 metra larg viktimës kishte rënë në ujë dhe nuk mund të zbulonin shenjat e gishtërinjve.
Një vrasje në mes të natës, por e filmuar në çdo kënd të saj arrihet deri aty sa të cilësohet si “aksidentale” nga krue i qeverisë dhe për të mbuluar një skandal të rëndë dhe mbi të gjitha ikjen e një jete njeriu futet dora në arkën e shtetit dhe i lidhet një pension babait të viktimës, me morivacionin e aksidentit. I riu nuk ra nga skela në ndërtim që të quhet aksidentale, as iu hodh përpara makinës së punonjësve të policisë që të quhet e tillë, por as i doli plumbit përpara…
