Real Madrid arriti një fitore shumë të rëndësishme mbrëmjen e djeshme, pasi të besuarit e Zinedine Zidane arritën të merrnin tre pikë në derbin kundër Atletico Madrid në shtëpi. Tekniku i galaktikëve u shpreh shumë i lumtur pas ndeshjes dhe e krahasoi këtë triumf me fitoren e Championsit kundër Borussia M’Gladbah.
“Ne nuk i lamë hapësira atyre për të dalë në lojën që luajnë zakonisht, është e vërtetë. Djemtë arritën atë që unë doja, të ndërronim lojën shpejt dhe të luanim me pasime diagonale. Modric dhe Kroos janë të shkëlqyer, të jashtëzakonshëm.
Benzema gjithashtu, Vazquez është fenomenal. Carvajal, Ramos, Varane… që të gjithë janë shumë të mirë”, deklaron francezi.
“Jam shumë i kënaqur me paraqitjen tonë, fiks si në fitoren e arritur në Champions League. Ky triumph vjen kundër një ekipi si Atletico, të cilët kishin 26 ndeshje që ishin të pamposhtur. Arritëm të ishim zot në fushën tonë dhe nuk i lamë ata të merrnin frymë. Kishin vetëm një shans me Saulin, por ishim ne ata që e kontrolluam sfidën”, përfundon Zidane.
