Gjykata e Tiranës kap pranuar kërkesën e prokurorisë duke lënë nën masën e sigurisë “arrest me burg” pa afat Nevaldo Hajdarajn, efektivi i policisë i cili qëlloi për vdekje me armën e shërbimit 25-vjeçarin Klodian Rasha.
Në gjykatë, efektivi është shprehur se do të donte që familjarët e viktimës të ishin prezent në sallë, në mënyrë që ai tu kërkonte ndjesë. Ai tha se nuk kishte synim të trembte Rashës, por u ndje i kërcënuar.
Efektivi akuzohet për veprën penale vrasje e kryer në kapërcim të kufijve të mbrojtjes së nevojshme. Nga hetimet paraprake është konkluduar se veprimet e punonjësit të Policisë bien në kundërshim me procedurat standarde të përdorimit të armëve të zjarrit, pasi ai nuk ka qenë në kushtet e përcaktuara në ligjin për përdorimin e armës së zjarrit, duke kapërcyer kufijtë e mbrojtjes së nevojshme.
Në seancë u zbulua se efektivët që kanë ndjekur të riun nuk ishin të pasijur me kamera trupi.
Krimi policor ndodhi rreth orës 01:45 të së Martës në Tiranë, sipas njoftimit nga autoritetet. Pas një ndjekje, një efektiv, në pamundësi për ta arritur, e qëlloi me armën e shërbimit të riun disa metra larg banesës, duke i shkarkuar vdekjen. Në njoftimin zyrtar për ngjarjen, policia deklaroi se efektivi që shkrepi armën, kujtoi se 25-vjecari që me gjasë vraponte për ti shpëtuar një gjobe për shkeljen e karantinës, “i drejtoi punonjësit të policisë një send të fortë në dukje armë zjarri”.
Autoritetet njoftuan se u gjet një pistoletë në rrugicat ku ndodhi ndjekja e të riut nga efektivi i policisë, por nuk është provuar se i riu ishte i armatosur (apo arma e gjetur i përkiste atij) dhe aq më tepër që kërcënoi efektivin që qëlloi ndaj tij.
Ngjarja solli reagime të shumta të politikës e shqoërisë civile. Protesta janë zhvilluar në disa qytete të vendit, ndërsa ato më masivet më masivja janë zhvilluar në Tiranë. Pas protestave, ministri i Brendhsëm, Sandër Lleshaj ka dhënë dorëheqjen.
