Nga BoldNews.al
Kuvendi i Shqipërisë do të restaurojë dy godinat, sallën e seancës plenare dhe kryesinë, pasi ka “gjetur” disa plasaritje. Përgjatë 1 viti, Instituti i Ndërtimit, ka bërë disa ekspertime në dy objektet dhe ka konstatuar se disa mure ndarës janë çarë, ndërsa ka rekomanduar se duhen rregulluar.
“Bold News” ka siguruar dokumentet e një tenderi që ka kryer Kuvendi i Shqipërisë, me një vlerë rreth 70 mijë euro. Objekti i procedurës është “projektim për riaftësimin e dy godinave të Kuvendit”, ndërsa aktualisht është shpallur edhe fituesi që është kompania “AVE CONSULTING”.
Gjatë këtij viti, ku qindra mijëra shqiptare janë ende në qiell të hapur, Kuvendi, i cili duhet të miratojë ligje për strehimin e tyre, është kujdesur për godinat ku qëndrojnë vetëm pak orë në muaj “baballarët e kombit”. Janë bërë disa analiza, fotografi, madje edhe video për disa plasaritje në të dyja godinat. Dhe, kaq ka mjaftuar që Kuvendi të “alarmohet” për sigurinë e deputetëve dhe kabinetit qeveritar. Frika e një tjetër tërmeti ka detyruar që të bëjnë tenderin, fillimisht për projektimin e ndërhyrjes dhe më pas ndërhyrjen totale. Pra, Kuvendi pritet të shpallë një tjetër tender me vlerë disa milionë euro për të ndërhyrë në këto godina, për të cilat ekspertët e Institutit të Ndërtimit vetëm kanë rekomanduar se duan disa ndërhyrje riparuese.
Megjithatë, përpos mallkimeve të përditshme të shqiptarëve, duket se me kaq dëmtime “nuk bie rrufeja në h…”. Në fakt, disa kohë më parë, Kuvendi ka bërë tender edhe për rrufepritës, nga frika e një rrufeje që mund të binte në godinat ku qëndrojnë deputetët, ministrat apo edhe kryeministri nga Surreli.
Në dokumentet e tenderit janë analizuar edhe dëmtimet në të dyja godinat. Ndryshe nga vonesat në strehimin e njerëzve të thjeshtë, apo edhe analizimin e pallateve të dëmtuara nga tërmeti, për godinën e Kuvendit gjërat janë bërë shumë më serioze. Sipas këtyre dokumenteve, objekti ku ndodhet selia e kuvendit të Shqipërisë është projektuar në vitin 1955 dhe ndërtimi i saj ka përfunduar rreth vitit 1961. Gjithashtu edhe Salla e Seancës Plenare është një ndërtesë e projektuar në vitin 1955.
“Duke qenë se kemi të bëjmë me një objekt të rëndësisë së veçantë ai duhet të kontrollohet për dy nivele performance: dëmtime të lehta dhe dëmtime të konsiderueshme, ruajtje të jetës”, thuhet në dokumente.
Sipas tyre, në përgjithësi në strukturë nuk ka ndërhyrje që kanë cënuar kapacitetin mbajtës. “Gjendja e godinës paraqitet e mirë, pa dëmtime të mëdha”, thotë vetë Kuvendi, duke ngritur disa pikëpyetje përse po shpenzohen kaq shumë para për një godinë e mirë. Por, le të analizojmë më tej pretendimet e Kuvendit. Sipas tyre, nga tërmeti u vërejtën dy lloje dëmtimesh; Plasaritje në muret strukturore, kryesisht në pjesën e jashtme të godinës, si dhe plasaritje të lehta në disa kollona dhe trare.
Gjithashtu ka edhe plasaritje në muret ndarës të objektit, siç kanë shumica e banorëve të Tiranës, Durrësit, Shiakut, Kavajës, Thumanës, Mamurrasit, e deri në Lezhë. Fituesi duhet edhe të evidentojë sa para’ duhen për ta rregulluar totalisht. Pra, shqiptarë, do të paguani miliona euro për sigurinë e “baballarëve të kombit”. Për 40 ditë, do të kemi një projekt të ri për Kuvendin, me qëllim që këta aktualët, por edhe ata pas 25 qershorit të jenë të sigurt!
