U deshën 34 orë që ministri i Brendshëm, Sandër Lleshaj të bënte një reagim lidhur me krimin policor të ndodhur orët e para të së Martës, kur një efektiv me uniformë qëlloi me armën e shërbimit një 25-vjeçar, duke i shkaktuar vdekjen.
Lleshaj zgjodhi të shkruante disa reshta në faqen e tij në rrjetin social FB, ku në thelb, shprehet se duhet një hetim i drejtë dhe i shpejtë.
“E VËRTETA ËSHTË NGUSHËLLIMI MË I MADH”, e nisi reagimin drejtuesi i Ministrisë së Brendshme, megjithatë vështirë se mund të gjendet një ngushëllim për prindërit e vëllezërit të cilët humbën njeriun e tyre të shtrenjtë.
Reagimi ka sjellë pakënaqësi te shumë qytetrë që i kanë shprehur me komente në statusin e ministrit. Shumë syresh i kërkojnë dorëheqjen, ashtu si protestuesit që marshuan mëngjesin e sotëm para zyrës së tij, e të tjerë që kanë lajmëruar të protestojnë gjatë pasdites.
Ka nga ata që i kujtojnë reagimin e vonuar dhe të tjerë që flasin për “një polici të padrejtë”.
“Shikoje dhe mundësinë të dorëhiqesh, s’ta ka lënë me trashigimi gjyshi postin. Ki pak dinjitet, të mbyten skandalet…”, shkruan një qytetar në reagimin e Lleshajt.
Të ngjashme janë shumica e komente me qytetarë që shprehin indinjatë dhe kërkojnë largimin e ministrit, si një gjest normal pas një krimi policor.
Krimi policor ndodhi rreth orës 01:45 të së Martës, sipas njoftimit nga autoritetet. Pas një ndjekje, një efektiv, në pamundësi për ta arritur, e qëlloi me armën e shërbimit të riun disa metra larg banesës, duke i shkarkuar vdekjen. Në njoftimin zyrtar për ngjarjen, policia deklaroi se efektivi që shkrepi armën, kujtoi se 25-vjecari që me gjasë vraponte për ti shpëtuar një gjobe për shkeljen e karantinës, “i drejtoi punonjësit të policisë një send të fortë në dukje armë zjarri”.
Megjithatë, viktima nuk rezultoi të kishte armë zjarri me vete. Autoritetet njoftuan se u gjet një pistoletë në rrugicat ku ndodhi ndjekja e të riut nga efektivi i policisë, por kurrsesi se viktimës iu gjet armë zjarri me vete. Nuk është provuar se i riu ishte i armatosur dhe aq më tepër që kërcënoi efektivin që qëlloi ndaj tij.
Efektivi që shtiu mbi Klodian Rashën është arrestuar për veprën penale “Vrasje e kryer në kapërcim të kufijve të mbrojtjes së nevojshme”. “Nga hetimet paraprake është konkluduar se dyshohet se veprimet e punonjësit të Policisë N.H., bien në kundërshim me procedurat standarde të përdorimit të armëve të zjarrit. Ai nuk ka qenë në kushtet e përcaktuara në ligjin për përdorimin e armës së zjarrit, duke kapërcyer kufijtë e mbrojtjes së nevojshme”, njoftoi SHÇBA.
