Cristiano Ronaldo ishte protagonist në fitoren 0-3 që Juventusi mori në Champions League kundër Barcelonës. Sulmuesi portugez shënoi dy gola me penallti dhe bardhezinjtë u morën katalanasve vendin e parë në grup.
Në fushë ishte edhe Leo Messi, i cili nuk ia doli të realizonte dot. Pas ndeshjes, Cristiano ishte shumë optimist prej asaj që Juventusi kishte shfaqur në fushën e blertë kundër Barcelonës. Një foto duke festuar u bë virale dhe portugezi kishte edhe dicka për të thënë:
“Gjithmonë është një kënaqësi të rikthehem në Spanjë dhe në Katalonjë, gjithmonë e vështirë të luash në Camp Nou kundër një prej ekipeve më të mira me të cilat jam përballur ndonjëherë.
Këtë herë ishim një ekip Championsi. Një familje e vërtetë, e fortë dhe e bashkuar. Duke luajtur kështu, ne nuk kemi pse të trembemi deri në fund të sezonit. Le të shkojmë përpara”, shkruan CR7 në rrjetet sociale.
Ronaldo ka folur edhe për Movistar pas ndeshjes: “Ishte thuajse mision i pamundur. Çelësi ishte ta nisnim fort dhe për 20 minuta e çuam rezultatin 2-0. Nga ai moment me të vërtetë besonim se mund ta kapnim vendin e parë. Kjo fitore na rrit besimin, duhej një e tillë kundër një ekipi të madh”.
“Rivaliteti me Messin? Ne kemi qenë në ceremonitë e ndarjes së çmimeve për 12-13 vite dhe kurrë nuk e kam parë si rival. Kjo është nxitur vetëm nga mediat. Gjithmonë kalonim shumë mirë dhe nëse pyesni Messin, ai do t’ju thotë të njëjtën gjë”.
