Në Indi një sëmundje ende e panjohur ka prekur më shumë se 500 njerëz të cilët janë shtruar menjëherë në spital. Simptomat variojnë nga nauze, gjendje anksioze, humbje e vetëdijes dhe konvulsione. Nga të prekurit, fatkeqësisht një person ka humbur jetën.
Një pjesë e mirë e të prekurve aktualisht janë në gjendje të mirë shëndetësore, ndërsa 150 janë ende të hospitalizuar duke marrë trajtim.
Sipas zyrtarëve, të sëmurët janë testuar për Covid-19 por kanë rezultuar negativë. Ekspertë nga institutet kryesore shkencore janë në fazat e para të hulumtimit mbi sëmundjen misterioze. ;farë vihet re është mungesa e një faktori të përbashkët të prekjes, pasi grupet e prekura, nuk jetojnë në zona të njëjta dhe nuk kanë të njëjtën moshë.
Hipoteza që aktualisht po testohet është se njerëzit hanin perime të ndotura me pesticide të bëra nga përbërje organike që përmbajnë fosfor. Por ky është një supozim i bazuar në faktin se pesticide të tilla janë të përdorura nga qytetarët, por jo sepse ka të dhëna konkrete. Testimet po vazhdojnë të kryhen për të parë nëse ka prani të lëndëve helmuese në rezervuare ujore apo në kopshtet me të mbjella.
