Edi Reja, trajneri i kombëtares shqiptare, ka reaguar pas hedhjes së shortit për kualifikueset e Katar 2022. Shorti e vendosi Shqipërinë në grup me Anglinë, Poloninë, Hungarinë, Andorrën dhe San Marinon.
“Nuk ishim me fat te shorti, them se na ka penalizuar. Anglia është kokë grupi dhe dihej që do na binte një ekip i fortë, ndaj pranohet. Polonia është e fortë, na ra një nga më të fortat në vazon e dytë. Hungaria tani po bën shumë mirë.
Shpresoja në grup tjetër, te Danimarka e Kroacia. Gjithsesi do të luajmë, edhe pse kemi pak shanse për vendin e dytë. Me San Marinon dhe Andorrën i llogaritin të gjithë pikë të plota dhe nuk ka nevojë për shumë komente”, tha Reja.
Në vijim, ai tha se ekipi është në rritje, ndërsa shpreson që të ketë kondicionin e duhur fizik.
“Ne do provojmë gjithçka. Shpresoj që në mars të ketë tifozë në stadiume, pasi me ata mund të bëjmë paraqitje edhe më të mira.
Nuk është se nuk do t’i provojmë shanset tona. Do provojmë gjithçka në fushë. Është e vështirë, nëse kapim vendin e tretë do tregojmë se kemi rritje. Këto ndeshja na japin shumë eksperiencë. Nëse nuk ia dalim të kualifikohemi në Botëror, atëherë do mundohemi të jemi gati për kualifikueset e Europianit. Sot votova Lewandowskin si lojtarin më të mirë dhe uroj të mos jetë në formë kur të luajë kundër nesh”, tha tekniku i kuqezinjve.
Në vijim ai shtoi se duhen ndeshje të mira, sakrificë.
“Është grupi vështirë, por jemi të bindur se do u tregojmë të gjithëve kush jemi. Do të luftojmë fort. Do luajmë në Wembli, Anglia vjen në Tirana, do ketë spektakël. Uroj që të kemi tifozët, pasi me ata karikohemi dhe bëjmë ndeshje të mira.
Pres që lojtarët të rriten gjatë kësaj periudhe. Në ndeshjet e fundit bëmë ndeshje të mira dhe treguam rritje, pavarësisht pikëve. Kemi bërë mjaft paraqitje të mira. Duhen kondicioni i duhur fizik për të bërë paraqitje të mira dhe që të mos parashikohesh”, tha ai.
