Ministrja e Shëndetësisë, Ogerta Manastirliu njoftoi se ditën e Hënën të javës së ardhshme do të nisin testimet e shpejta për identifikimin e koronavirusit.
Manastirliu, në një deklaratë për mediat, tha se, të Hënën, nis fillimisht aplikimi i testimit të shpjetë në Tiranë nga epidemiologët, në “vatrat që do vlerësohen prej tyre, bazuar në udhëzuesin e miratuar nga ISHP dhe Komiteti i Ekspertëve”.
Ajo shtoi se më 20 Dhjetor, testimet e shpejta do shtrihen dhe në disa politiklinika dhe disa qendra shëndetësore në Tiranë dhe më pas, sipas një kalendari, në disa struktura shëndetësore në gjithë vendin.
Pikat e testimit, shtoi, do bëhen të njohura ditët në vijim dhe do mbulojnë zona të caktuara gjeografike.
Ministrja tha se “kemi siguruar 100 mijë testime të shpejta” dhe shtoi se jemi në procedura për të siguruar mbi 300 mijë të tjera.
Testimet e shpejta e nxjerin rezultatin në një kohë shumë më të shkurtër se testimet PCR, që janë përdorur deri më tani nga autoritetet shëndetësore. “Përgjigjet merren brenda 30 minutave”, shpjegoi Silva Bino, anëtare e Komitetit Teknik.
“Testi i antigenit kryhet në 5 ditët e para të simptomave. Ky është një informacion që duhet të dihet. Nëse është pozitiv, ai është vërtetë pozitiv, mat ngarkesën virale. Përgjigja del për 30 minuta. Kjo është lehtësi e madhe, sepse i jep direkt përgjigjen personit dhe lehtëson gjurmimin. Ky test do të na ndihmojë të plotësojmë disa elementë të punës sonë në terren. Po kryhen disa trajnime. Është test i njohur nga OBSH dhe i aprovuar nga FDA”, tha shefja e departamentit të sëmundjeve infektive në ISHP.
Ndërsa ministrja Manastirliu tha se testimet PCR, po ashtu, do të vijojnë të aplikohen.
