Policia e Shtetit jep detaje për operacionin “Befasia” të zhvilluar një ditë më parë në Rrëshen, por ende nuk ka shifra zyrtare për sasinë e drogës së kapur, e cila dyshohet të jetë deri në 3 tonë.
Komunikata e policisë sqaron se ka filluar të peshohet sasia e hashashit të gjetur në magazinën e shtetasit K.R., te vendi i njohur si ish-Grumbullimi në dalje të Rrëshenit. Gjatë kontrollit u konstatua një sasi e madhe bimësh ne proces tharjeje dhe përpunimi.
Pronari i magazinës së përshtatur për tharjen e bimëve narkotike është shpallur në kërkim. Policia e Lezhës dhe forcat e FNSH, gjatë ndërhyrjes në magazinë kapën duke punuar 22 shtetas, të cilët u arrestuan.
Në gjendje të lirë po procedohen edhe 9 të tjerë. Veprat penale në ngarkim të këtyre shtetasve janë “Prodhimi dhe shitja e narkotikëve” dhe “Grupi i strukturuar kriminal”.
Siç edhe duket në videon e bërë publike nga policia duken edhe momentet kur vihen në pranga 22 personat e gjetur në fabrikën e kanabisit.
