Capello: Jam gati për Italinë, për mua çështje prestigji

Fabio Capello është gati të marrë detyrën e trajnerit të ekipit kombëtar të Italisë pas “Euro 2016”. Ish-trajneri i Anglisë dhe Rusisë është gati të ulet në stolin që do të lërë bosh Antonio Conte pas përfundimit të Europianit. Lajmin e kanë konfirmuar sot mediat italiane, që kanë shtuar edhe për një takim që Capello do të zhvillojë në Udine, gjatë miqësores Itali-Spanjë, me presidentin e Federatës Italiane të Futbollit, Tavecchio. Duket se përvoja që “don Fabio” ka si trajner në arenën ndërkombëtare do ta bindë FIGC-në t’i besojë atij detyrën e trajnerit edhe pse në “pole” duket Roberto Donadoni. Tavecchio kërkon një trajner ekspert për Kombëtaren dhe caktimin e trajnerit të ri dëshiron ta bëjë para Europianit, ndaj Fabio Capello, 69 vjeç, plotëson kushtet. Duket se Federata Italiane e Futbollit kërkon të zgjidhë të gjitha enigmat para Europianit dhe i vetmi trajner i gatshëm të pranojë kushtet e FIGC është Capello, që e kërkon këtë pozicion më shumë si prestigj. “Unë jam gati për sfidën“, tha Capello.