Pas rastit të së Premtes, një tjetër i infektuar me koronavirus, me përgjigjen e tamponit pozitiv me vete, ka tentuar të kalojë kufirin për të shkuar në Greqi.
Policia njofton se ai është proceduar në gjendje të lirë, për veprën penale “Moszbatimi i masave të autoriteteve shtetërore gjatë gjendjes së masave të jashtëzakonshme apo gjatë gjendjes së epidemisë”.
“Ditën e sotme u referuan materialet hetimore në Prokurorinë e Rrethit Gjyqësor Gjirokastër, për shtetasin M.G, 63 vjeç, banues në fshatin Armen, Vlorë. Gjatë kontrollit të ushtruar në vijën e dytë në PKK Kakavijë, pas kontrollit të dokumentit të PCR, ka rezultuar pozitiv me SARS – COV 2, sipas analizave të një laboratori në një klinikë private. Gjithashtu, këtij shtetasi i është vendosur edhe masa administrative në vlerën 700.000 lekë”, njoftoi policia.
