Amir Abrashi, futbollisti shqiptar, që luan në Bundesligë, me Freiburg, shënoi gol fundjavën e kaluar duke zhvilluar edhe një ndeshje mbresëlënëse.
Ai është përfshirë në formacionin më të mirë të javës në Europë, në katër ligat kryesore të kontinentit të vjetër.
Shtatshkurtëri kuqezi, tejet energjik, e sheh veten në një “skuadër” me Cristiano Ronaldo (Real Madrid), Gonzalo Higuain (Juventus) dhe Leonardo Bonucci (Juventus), mes të tjerëve.
Prestigjiozja franceze, “France Football” shkruan: “Duke bërë emërimin e ditës së hënë, si çdo fillimjavë, këtu është ekipi më i mirë i yni, referuar ndeshjeve të fundjavës së kaluar në katër ligat e mëdha europiane (Bundesliga, Liga, Premier League, Serie A). Të njëmbëdhjetë lojtarët sillet rreth top-formacionit 3-4-3”. Sikurse duket edhe në skemën përkatëse, Abrashi është përzgjedhur si një nga mesfushorët qendrorë më të mirë, krahas Linetty. Duke dhënë vlerësimin përkatës për secilin, “France Football” e justifikon kështu përfshirjen e mesfushorit kuqezi në formacionin e vet, të javës që shkoi: “Ishte motori i Freiburgut në fitoren 3-1, në Bremen. Autor i golit të tretë, shqiptari gjeti rrugën e rrjetës pas 12 muajsh thatësirë.”
