Fushata presidenciale në SHBA me tona të ashpra ka revoltuar dhe Presidentin Barack Obama, i cili u ka bërë thirrje të gjithë kandidatëve që të frenojnë shpërthimet e tyre vulgare.
“Kjo fushatë po bëhet gjithnjë e më shumë e dhunshme”, ka deklaruar presidenti Obama.
Ai nuk ka përmendur asnjë kandidat me emër por i ka kritikuar ata të gjithë.
“Kemi dëgjuar retorikë vulgare dhe përçarëse që prek gratë dhe pakicat”, ka thënë Obama. “Bota i kushton vëmendje asaj që themi dhe asaj që bëjmë”, ka shtuar ai.
Duke mos përmendur asnjë kandidat me emër, Obama ka thënë se shumë ngjarje të fushatës janë shënuar me përleshje dhe përpjekje për të nënçmuar pikëpamjet e kundërshtarëve. “Është një cikël që nuk është pasqyrim i saktë i Amerikës. Duhet të ndalojë. Kjo nuk është çështje e korrektësisë politike. Ka të bëjë më mënyrën se si sjellja gërryese mund të minojë demokracinë tonë, shoqërinë tonë dhe madje ekonominë tonë”, ka thënë Obama.
Zgjedhjet presidenciale në SHBA do të mbahen më 8 nëntor. Obama ka shërbyer dy mandate. Favoritë për ta zëvendësuar atë janë Hillary Clinton nga Partia Demokratike dhe Donald Trump nga Partia Republikane.
