Kryeministri Edi Rama është parë të martën të pijë kafe me kreun e PAA-së, Agron Duka, si dhe ish-deputetin Ndre Legisi, në hotel “Rogner”.
I kontaktuar në telefon nga gazeta “Panorama”, kreu i PAA-së tha se ka qenë një ftesë e Kryeministrit Rama për të pirë një kafe me të kur janë takuar në festimet e Universitetit Bujqësor të Kamzës.
“Pas ceremonisë festive në Kamzë, Kryeministri Rama më pyeti nëse mund të pinim një kafe bashkë. Unë iu përgjigja pozitivisht, sepse ne jemi kundërshtarë politikë, por jo armiq. Atëherë, më tha, takohemi në ‘Rogner’ dhe kështu u bë”, – tha Duka.
Në shoqërinë e tyre ka qenë edhe ish-sekretari i kryesisë së PS për koalicionet, Ndre Legisi, edhe ai student i Institutit të Lartë të Kamzës, bashkë me Agron Dukën. Socialistë dhe PAA ballafaqohen në Kolonjë për të fituar kreun e bashkisë. LSI nuk ka pranuar të kandidojë një tjetër emër nga anëtarësia e saj pas ndarjes nga jeta të kryetarit të bashkisë Arben Malo, duke vënë përballë PS-në dhe PAA-në, të cilës edhe PD-ja i la zonë të lirë në këtë bashki.
Në konventën kombëtare të PAA-së, nënkryetari i Grupit Parlamentar socialist Taulant Balla, në përshëndetjen e tij në emër të PS, i kërkoi Dukës që të rreshtohet me koalicionin qeverisës.
