Nga Boldnews.al
Prej dy ditësh po aplikohet vendimi për ndalimin e automjeteve nga ora 22.00-06.00 të mëngjesit, e justifikuar nga qeveria si masa për të parandaluar përhapjen e COVID-19 në vend. Nga një vëzhgim në rrugët e kryeqytetit, rezulton se pjesa më e madhe e qytetarëve detyrohen të kyçin automjetet para orës 22.00, me përjashtim të kategorive që marrin leje për arsye pune ose urgjencë mjekësore.
Tirana i ngjan një ore të mirëfilltë policore, teksa kudo shihen makinat e policisë me sirena ndezur dhe rendin vrik sapo shohin një autoveturë që qarkullon pas orarit të lejuar. Por rrugët janë të lira për kamionët e tonazhit të rëndë që shkojnë rresht për të dërguar materialet e ndërtimit në pallet shumëkatëshe dhe kullat e Tiranës në ndërtim e sipër.
Këtë “orë policore” duket se priste edhe kryepolici i Qarkullit Rrugor në Tiranë Erion Ahmeti. Nuk i mjafton vetëm dita ku betonieret e oligarkisë zaptojnë rrugët, por tashmë i kanë akset e lira pas orës 22.00, ku në fakt nuk quhet më “orë policore”, por orari i lirë i oligarkisë.
Mjetet e tonazhit të rëndë as nuk tentohet që të ndalohen, ndërsa për qytetarët ka një “tjetër ligj” i cili në duart e Ahmetit dhe vartësve të tij është qartësisht i dukshëm. Këtë e vërteton çdo qytetar që mund të lëvizë pas orës 22.00 ku në çdo cep të Tiranës dhe teksa të gjithë zhyten në ankthin që të jep ora policore, veshët u zhormojnë nga makineria e bosëve të ndërtimit. Këta të fundit ngjajnë se janë në garë me njëri-tjetrin, ku për të arritur qëllimet në ngritjen e pallateve dhe kullave, u mjafton që të arrijnë marrëveshjen me “Kompaninë 2 Erionë”…
Në fillim duhet të aplikojnë për leje ndërtimi tek kryenashkiaku i Tiranës Erion Veliaj. Numri një i bashkisë së kryeqytetit e ka vërtetuar se dora e tij është “lodhur” duke hedhur firma mbi çdo kërkesë për leje ndërtimi, kryesisht palate dhe kulla. Pas tyre gjithnjë fshihet një grusht i vogël oligarkësh që Tiranën e kanë kthyer në oazin e betonit dhe zaptimin e frymës së qytetarëve.
Menjëherë pasi sigurojnë lejen e ndërtimit nga Lali i Tiranës do u duhet të bëjnë edhe një tentativë tjetër tek adashi i kryebashkiakut… U nevojitet edhe “izmi” i Erionit tjetër në Policinë e Qarkullimit Rrugor, Erion Ahmetaj. Prej tije merret ajo “leje xhentëllmenësh” e cila u nevojitet që të mos pengohet asnjë kamion i tonazhit të rëndë që shërben për ndërtim pallatesh dhe kullash.
Tashmë është “vala e dytë” e “sulmit” të oligarkisë në ngritjen e objekteve shumëkatëshe pasi po përfitojnë edhe nga mungesa e qarkillimit të automjeteve për qytetarët në mënyrë që të lëshojnë flotën e tyre të makinerisë së zhurmshme dhe ndotëse të ndërtimit. Pandemia për Ahmetajn e rrugores po kthehet në vlerë të dyfishtë; nga një anë “realizon planin” me gjobitjen e qytetarëve që kapen qoftë edhe pak minuta jashtë orarit duke lëvizur dhe në anën tjetër u bën nderin oligarkëve!
