Të parët që do të marrin vaksinën kundër kovidit do të jenë amerikanët. Sipas shefit të programit të vaksinave të koronavirusit në SHBA, amerikanët do ta marrin atë jo më larg se 11 dhjetori.
Dr Moncef Slaoui i tha CNN se plani ishte që sapo vaksina të miratohet, të shpërndahet menjëherë. Në të gjithë botën rastet e reja po shtohen në mënyrë alarmante, dhe vaksina është shpresa e botës e cila mund të ndryshojë situatën për mirë. SHBA ka regjistruar më shumë se 12 milion raste dhe 255,000 vdekje.
Kompania farmaceutike amerikane Pfizer dhe partneri i saj BioNTech paraqitën një kërkesë të premten për autorizimin e përdorimit të vaksinës së tyre Covid-19, në SHBA.
Pfizer shpreson të prodhojë deri në 50 milionë doza në 2020 dhe deri në 1.3 miliardë doza në 2021. Çdo person ka nevojë për dy doza.
Një komitet këshillimor i vaksinave të Administratës së Ushqimit dhe Barnave (FDA) do të mblidhet më 10 dhjetor për të vendosur nëse do të autorizojë vaksinën. Dr Slaoui tha se vaksina mund të shpërndahet ditët e para pas miratimit, në 11 apo 12 dhjetor.
Ai tha se vaksina do të shpërndahet bazuar në popullsinë e secilit shtet. Shtetet do të jenë përgjegjëse për të vendosur se kush e merr vaksinën së pari, por rekomandohet që përparësi t’u jepet atyre që janë më të rrezikuar.
Dr Slaoui tha se deri në maj, SHBA mund të arrijë “imunitetin e tufës” me 70% të popullsisë të vaksinuar.
Gjithashtu ditën e sotme udhëheqësit e G20 thanë se ata “nuk do të kursejnë asnjë përpjekje” për të siguruar shpërndarjen e vaksinave në të gjithë botë.
