Ministrja e Shëndetësisë, Ogerta Manastirliu, duket se është zyrtarja e parë e Qeverisë Rama, që shpërfill urdhërin për moslejimin e grumbullimeve me më shumë se 10 vetë.
Megjithëse një urdhër i tillë, i propozuar nga Komiteti Teknik i Ekspertëve, është firmosur nga vetë Manastirliu në datën 17 nëntor, të nesërmen, pra me datën 18, ministrja shfaqet duke pozuar me një grup mjekësh dhe stafi mjekësor.
Foto tregon qartë se janë mbi 10 persona, që bie ndesh me një nga pikat e urdhëresës e cila ndalon grumbullime qoftë në mjedise të hapura ashtu edhe të mbyllura të më shumë se numrit që kanë propozuar ekspertët e komitetit.
Ndoshta, edhe vetë ministrja e Shëndetësisë nuk i beson urdhërave që firmos vetë, ose ecën me tezën “bëni siç them unë, por mos bëni siç bëj unë”.
Urdhërat që dalin si propozime komiteti në fakt janë shpërfillur edhe më parë nga zyrtarët e Rilindjes. Kujtojmë këtu urdhërin e mbajtjes me detyrim të maskës në mjedise të hapura dhe të mbyllura, por që nuk u respektua për një kohë të gjatë nga disa prej funksionarëve dhe figurave qendrore të Rilindjes.
