Gjithsej 1 039 464 fëmijë në SHBA kanë rezultuar pozitiv në testin COVID-19 deri më 12 nëntor, njoftuan përmes një kumtese nga Akademia Amerikane e Pediatrisë (AAP) dhe Shoqata e Spitalit të Fëmijëve.
Në deklaratë thuhet se gjatë një periudhe një javore që përfundoi më 12 nëntor, u regjistruan 111.946 raste të reja të koronavirusit tek fëmijët, që është dukshëm më shumë se çdo javë të mëparshme të pandemisë.
“E vlerësoj këtë shifër si tronditëse dhe tragjike. Ne nuk kemi parë një virus të përhapet aq shpejt nëpër komunitetet tona në këtë mënyrë pasi më parë kemi pasur vaksina për fruth dhe poliomielit”, theksoi presidentja e AAP-së, Sara Goza, e cila ka qenë pediatre për më shumë se tre dekada.
“Përderisa ne presim që një vaksinë të testohet dhe licencohet për të mbrojtur fëmijët nga virusi që shkakton COVID-19, ne duhet të bëjmë më shumë tani për të mbrojtur të gjithë në komunitetet tona. Kjo është edhe më e rëndësishme teksa i afrohemi dimrit, kur njerëzit natyrisht kalojnë më shumë kohë në ambiente të mbyllura ku është më e lehtë për t’u përçuar virusi”, shtoi ajo.
Deri më tani ka dy kandidatë të suksesshëm të vaksinave kundër COVID-19, një nga kompania amerikane Moderna që njoftoi se vaksina e saj është 94,5 për qind efikase dhe një tjetër nga prodhuesi amerikan i barnave Pfizer dhe kompania gjermane e bioteknologjisë BioNTech, të cilët javën e kaluar deklaruan se vaksina e tyre ka më shumë se 90 për qind efikasitet.
/ata/
