Kryetari i Lëvizjes Vetëvendosje, Albin Kurti në një konferencë për mediat bëri me dije se presidenti i Kosovës duhet të përfaqësojë unitetin e popullit, por kjo sipas tij nuk mund të bëhet kur ka një qeveri të paligjshme.
Gjatë fjalës së tij Kurti theksoi se mes Shqipërisë dhe Kosovës nuk do të ketë bashkëpunime si shtete nëse do të mbajnë qëndrime të ndryshme ndaj Serbisë, ndërsa shtoi se “Kosova dhe Shqipëria nuk e kanë jo vetëm luksin, por as të drejtën që të dallojnë sa i përket Beogradit”.
Pjesë nga fjala e kryetarit të Lëvizjes Vetëvendosje Albin Kurti:
“Nuk mund të ketë unitet pa legjitimitet. Presidenti ose Presidentja e re duhet të përfaqësojë unitetin e popullit dhe kjo nuk mund të bëhet në kushte kur kemi qeveri të paligjshme.
Pas zgjedhjeve të reja mund të kemi president të ri dhe qeveria e vjetër nuk ka as legjitimitetin dhe as kredibilitetin për iniciativa të tilla. Ne besojmë se zgjedhjet duhet të jenë sa më parë, pasi çdo ditë e humbur është ditë e fituar për të korruptuarit. Por kjo nuk varet vetëm nga Lëvizja Vetëvendosje. Është e qartë se me kryeministrin e Republikës së Shqipërisë Edi Ramën, nuk kemi të njëjtin qëndrim sa i përket Presidentit të Serbisë.
Kjo është një pikë e rëndësishme në të cilën ne dallojmë. Fatkeqësisht kryeministri i Shqipërisë nuk guxon ta thotë të vërtetën për Presidentin e Serbisë, se për çfarë arsye nuk di ta them. Ne duhet të bashkohemi për Luftën Çlirimtare, për UÇK, por edhe kundër Serbisë e cila është kundër nesh. Nuk do të mund të bashkohemi si komb, nuk do të mund të bashkëpunojmë si shtete, me qëndrime të ndryshme ndaj Serbisë.
Kosova dhe Shqipëria nuk e kanë jo vetëm luksin, por as të drejtën që të dallojnë sa i përket Beogradit. Mospajtimet tona vijnë nga ky dallim, dallimi thelbësor janë qëndrimet e ndryshme, që i kanë ul Kryeministrin e Shqipërisë dhe Presidentin e Serbisë.
Edhe kryeministrit të Shqipërisë sidomos Kuvendit të Republikës së Shqipërisë i bëj thirrje që siç e ka miratuar Kuvendi i Republikës së Kosovës rezolutën për dënimin e genocidit të Serbisë në Kosovë ta bëjë edhe Kuvendi i Shqipërisë”, tha Kurti.
