Një kat shtesë në hotelin në Shëngjin në kundërshtim me vendimin e Agjencisë së Zhvillimit të Territorit, ka sjellë arrestimin e një biznesmeni. Në kuadër të të njëjtit hetim është shpallur në kërkim një ish-drejtor i Bashkisë Lezhë, një punonjës aktual i kësaj bashkie, si dhe është proceduar në gjendje të lirë një tjetër punonjëse.
I arrestuari është Fred Ndoka, 46 vjeç, banues në Lezhë, pronar i një hoteli në Shëngjin.
Ndërsa në kërkim janë shpallur: Sokol Toma, 47 vjeç, ish-drejtor i Drejtorisë së Planifikimit të Territorit dhe Zhvillimit Urban në Bashkinë Lezhë dhe N. C., 41 vjeç, me detyrë specialist në Drejtorinë e Planifikimit të Territorit dhe Zhvillimit Urban në Bashkinë Lezhë.
Gjithashtu, u procedua në gjendje të lirë A. M., 32 vjeçe, banuese në Lezhë, me detyrë përgjegjëse sektori në Drejtorinë e Planifikimit të Territorit dhe Zhvillimit Urban në Bashkinë Lezhë.
Hetimet
Hetimet që çuan në finalizimin e operacionit policor “Urbanistika” zgjatën 3 javë, sipas policisë së Lezhës.
Të njëjtat burime sqaruan se, specialistët e Hetimit të Krimit Ekonomik e Financiar pranë DVP Lezhë, kanë zhvilluar hetimet mbi bazën e informacioneve të siguruara në rrugë operative se Fred Ndoka, pronari i një subjekti në Shëngjin, kishte ndërtuar në mënyrë të paligjshme një kat shtesë në objektin e tij 7-katësh, me funksion hotel, në kundërshtim me vendimin e Agjencisë së Zhvillimit të Territorit, duke ndikuar në mënyrë të paligjshme kundrejt premtimit dhe përfitimit material tek shtetasit Sokol Toma, N.C. dhe A. M., për proceduren e miratimit të lejes së ndërtimit.
Dosja i ka kaluar prokurorisë së rrethit, ndërsa akuzat që janë ngritur nga policia janë: “Shpërdorim detyrë” e kryer në bashkëpunim për Sokol Toma, N. C., A. M., dhe “Ushtrimi i ndikimit të paligjshëm ndaj personave që ushtrojnë funksione publike” dhe “Ndërtim i paligjshëm” për biznesmenin Fred Ndoka.
