Tre persona, mes tyre një grua, janë arrestuar nga policia e Elbasanit nën akuzën e trafikut të drograve të forta.
Burime zyrtare sqaruan se, specialistët për Hetimin e Narkotikëve dhe Trafiqeve të Paligjshme në DVP Elbasan, në bashkëpunim me Forcat Operacionale, në bazë të informacioneve të siguruara në rrugë operative, finalizuan operacionin policor të koduar “Weekend”, në kuadër të të cilit u arrestuan në flagrancë shtetasit: U. P., 48 vjeç, banues në Elbasan, D. P. 48 vjeç, Cërrik dhe A. K., 39 vjeçe, banuese në Elbasan.
“Arrestimi i tyre u bë pasi mbi bazën e informacioneve të siguruara se këta shtetas merreshin me shpërndarjen e drogave në doza të vogla, shërbimet e Policisë kanë nderhyrë në banesën e shtetasit U. P., ku ndodheshin të tre shtetasit e arrestuar dhe gjatë kontrollit të ushtruar, gjetën dhe sekuestruan në cilësinë e provës materiale 162 gramë heroinë, 4 gramë kokainë, 41 gramë kanabis dhe një peshore elektronike që përdorej për peshimin e dozave të lëndës narkotike”, njoftoi policia.
